Ստատինները կարող են կանխել մարդու կուրությունը. news.am

Տարիքային մակուլյար դեգեներացիայի (ՏՄԴ) դեպքում ստատիններն ունակ են կանխել տեսողության կորուստը՝ նվազեցնելով խոլեսթերինի մակարդակը, պարզել են Հարվարդի բժշկական դպրոցի հետազոտողները:

Հետազոտողները ենթադրում էին, որ մակուլյար դեգեներացիայի զոհերի համար կարող են օգտակար լինել այն դեղերը, որոնք մաքրում են արյունատար անոթներում ճարպային կուտակումները: Նախորդ հետազոտություններից որոշակի եզրակացության չէին հանգել, բայց հիմա ապացուցված է, որ ստատինների բարձր չափաբաժինները (ավանդականներից գրեթե կրկնակի ավելին) ունակ են բարելավել տեսողությունը:

Ստատինների կատեգորիային պատկանող «լիպիտոր» դեղի բարձր չափաբաժիններով բուժումը մաքրել է ՏՄԴ ունեցող 10 հիվանդների ցանցաթաղանթի հետեւում ճարպային կուտակումները, ինչի շնորհիվ նրանց տեսողությունը լավացել է: Ներկայում գիտնականները համարում են, որ այս նախնական հետազոտությունների բավականին խոստումնալից արդյունքները կարող են նպաստել տեսողությունը կորցնող միլիոնավոր մարդկանց բուժմանը:

Տարիքային մակուլյար դեգեներացիան տարիքի հետ զարգացող հիվանդություն է, որի պատճառը ճարպային լիպիդների ու սպիտակուցների կուտակումներն են ցանցաթաղանթի տակ: Ժամանակի ընթացքում հիվանդների տեսողությունն ավելի աղավաղված է դառնում, կամ, առհասարակ, կորցնում են կենտրոնական տեսողությունը, ինչը դառնում է մասնակի կուրության պատճառ:

Հարցեր, պատասխաններ, մեկնաբանություններ